minibus manners

In a place in which human beings seem to want to cuss up more readily than trying to be nice, it is a surprise when you meet a conductor who respond to the good afternoon.. and is a conductor who rum perfume still smelling and who shirt could mix wid lil soap powder.

De man recognise me from somewhere though and keep meking eye contact and suh every time somebody come in de bus. A lady pun she cell phone "i going down by Courts fuh pay dis money' and conductor saying some words to me dat I aint understand. When de lady come out de bus, he say "wha' wrang wid she.. is a public place, is suh yuh money does get tief, when you advertise' (I recall when I ketch sight of a blackberry whatsapp message thing wid a lady saying she got de $30,000 and now coming wid it. I also recall anodda time when a lady in a bus on de cell phone seh she deh in a taxi coming so .. )

I tell de man, nah man, you bus aint gun gat tief man in it. He seh.. nah,, people doan understand fuh shut deh mout.

De man explain dat he was in South Central drinking by he self (South Central is a place pun South Road that when you walk fast, you could past it, it have high gate but when you look in.. is deep inside.. and well.. okay.. ) and he tell de bar man he going and collect some money fuh pay fuh de items and how when he walk out he realise somebady watching he and he could ah lose he life.
So is a caring conductor.. and when a lady want to stop de bus far from a bus stop, he cuss de driver and say he not opening no door because is not a bus stop and he seh de lady could come out and walk de piece .. so dis conductor is law abiding..

anodda bus same day.. i jump in by de light.. and aint worry wid seatbelt (yeah I know, I was on de vigil and petition from mothers in black fuh seat belt law but de only time in a minibus i wear is when de driver seh put on de belt look police.. )
and so i jump in at de light and de conductor cussing because de driver in front doan want to jump de light.. and dere is no good afternoon or nutting.

Is bare dodging light, going tru' side street, keeping music high and in and out de bus.

Was a day wid nuff bag, and one ah dem bus wheh de driver gat a conductor license so he doan need no conductor,  meh two salt bag was overloaded as wid life, we does sometimes tek on more dan we have space fuh.. plus i had egg so.. you know.. someting bout being a man.. manhandling two heavy salt bag wid goods while being gentle wid de eggs ...

but a young lady who de seh good afternoon when she come in de buss and sit behind be open de bus door fuh me before I even reach fuh open and come out.. was one of dem nice ting.. was de day before meh weekly shaving day so de grays was full out .. and so i say thanks loudly.. and try to stride down de road wid de two heavy bag and de egg in case de young lady tink was some helpless big man she did dealing wid..