You does know dem...

I deh in de back of de bus and I see a lil stir. Conductor leaning head out of de window and trow' some comment at somebody and I see de two lady next to me look outside and smile.. an she someting. I look outside and I see couple people.. is near Bourda Market but nuttin dat seh laff.. I seh wid a smile.. eh ', what yuh seh... she smile and seh.. no nutting just dat yuh does know dem.. i seh 'oh who'? and she seh.. dat boy.. who was walking like a gyurl.. you does know dem.. i look back and i kind of see a boy who might be fling hands like me.. and who just come out of barber shop and I think of all de boys who like dat.. and I seh..
but but.. once dem aint do nobody nutting right? .. and she seh yes  yes.. nutting wrang wid dem.. and I seh.. but you know plenty of dem doan walk like gyurl some ah dem mo big and strang dan me and you.. and she laff..

An i think bout last week, de same conversation wid nice people who talk about 'dese people' and 'dere lifestyle' and how you have to learn to accept people dat who have different lifestyle and I ask a man who say he is a MSM to describe what he do de night before and he seh he go home, bathe, eat, watch news, go down de road and tek a gaff and I ask de odder people.. so ahm.. is dat lifestyle different from yall own? Yall didn't bathe and eat last night too?

So  yeah.. de gay ting.. some people can only handle gay who well.. not gay or keep dere bizness in de bedroom..or not flamboyant or doan bring dey bizness to dem ..  but den again.. is like if straight people does only keep de bizness in de bedroom.. ah mean.. you hold hand, you walk and sup off gyurls a, you walk and trow comments and laff at boys walking like girls or girls who looking like man.. so straight people always dey everywhere, not only in de bedroom.. so how you expect gay people fuh keep dey bizness dere?  So is like de Christian dem who can love de sinner but aint want no evidence of de sin.. or like how Foucault apparently did seh someting like "people arite wid seeing two man go home from de party, is when dey see dem in de morning laffing and holding hands, den dey get problems wid dat" which I get from a book called Covering .. about how some people who experiencing discrimination 'covering'.. hide their characteristics or work harder at being 'normal' .. and I tink about de men dem who tell me dat dey could have never hide who dey be because long as dey remember people always calling dem 'gyurl'.. and I tink bout de odders who do ting like married and pray fuh conversion and who deh pun down low and suh and 'covering' and who you cyan look at know dem..
and I tink how de man last week keep telling me he cyan believe I is Hindu and even though he see me sutra pun me wrist.. and I think.. am i covering in dis gaff wid him?

but dat is de ting wid diversity.. sometimes yuh can know dem, and sometimes yuh cyant.. but all good to people who dont cover and who let people know what dem is and what dem isn't